మరో 15 రోజులు లాక్‌డౌన్..! కేసీఆర్ గ్రీన్ సిగ్నల్..!?

హైదరాబాద్ నగరంలో కరోనా కేసులు పెరుగుతున్న వేళ.. నగరంలో మరోసారి లాక్‌డౌన్ విధించే అవకాశం ఉందని కేసీఆర్ సంకేతాలు పంపారు. హైదరాబాద్ లో 15 రోజుల పాటు మళ్లీ లాక్‌డౌన్ విధించాలని సీఎం కేసీఆర్‌కు అధికారులు నివేదించారు. దీనికి సానుకూలంగా స్పందించిన సీఎం.. లాక్‌డౌన్ విధించేందుకు విధివిధానాలు సిద్ధం చేయాలని అధికారులను ఆదేశించారు. జీహెచ్ఎంసీ పరిధిలో కరోనా కట్టడికి అనుసరించిన వ్యూహాలను 3-4 రోజుల్లో ఖరారు చేయాలని కేసీఆర్ నిర్ణయించారు.ఆదివారం ప్రగతి భవన్లో ఉన్నత స్థాయి సమీక్ష సమావేశం నిర్వహించిన సీఎం.. పాజిటివ్ కేసులు ఎక్కువ వచ్చినంత మాత్రాన ఆందోళన చెందాల్సిన అవసరం లేదన్నారు. అందరికీ సరైన వైద్యం అందించడానికి ప్రభుత్వం ఏర్పాట్లు చేసిందన్నారు. కరోనా వ్యాప్తి, నివారణకు తీసుకుంటున్న చర్యలు, బాధితులకు చికిత్స అందిస్తోన్న తీరు, భవిష్యత్తులో అనుసరించాల్సిన వ్యూహంపై ఈ భేటీలో సమాలోచనలు జరిపారు. మంత్రులు ఈటల రాజేందర్, కేటీఆర్, వేముల ప్రశాంత్ రెడ్డి, ప్రభుత్వ ప్రధాన కార్యదర్శి సోమేశ్ కుమార్, వైద్య శాఖ అధికారులు ఈ సమావేశంలో పాల్గొన్నారు.దేశవ్యాప్తంగా కరోనా వ్యాప్తి వేగంగా ఉందని.. అలాగే తెలంగాణలోనూ పాజిటివ్ కేసులు పెరుగుతున్నాయని సీఎంకు మంత్రి ఈటల తెలిపారు. జాతీయ సగటుతో పోలిస్తే రాష్ట్రంలో మరణాల రేటు తక్కువగానే ఉందన్నారు. ప్రభుత్వ హాస్పిటళ్లలతోపాటు ప్రయివేట్ మెడికల్ కాలేజీల్లోనూ వేలాది బెడ్లు సిద్ధంగా ఉన్నాయన్నారు. వ్యాధి లక్షణాలు లేని వారిని ఇంట్లోనే ఉంచి చికిత్స అందిస్తున్నామని తెలిపారు.కోవిడ్ మరణాల జాతీయ సగటు 3.04 ఉండగా, తెలంగాణలో 1.52 శాతమేనని వైద్య ఆరోగ్య శాఖ ప్రత్యేక ప్రధాన కార్యదర్శి శాంత కుమారి ప్రభుత్వానికి పంపిన తాజా నివేదికలో పేర్కొన్నారని ఈటల తెలిపారు. జీహెచ్ఎంసీ పరిధిలో వైరస్ వ్యాప్తిని నియంత్రించడానికి మరోసారి 15 రోజుల పాటు లాక్ డౌన్ విధించాలని వైద్యాధికారులు, వైద్య నిపుణులు కోరుతున్న విషయాన్ని మంత్రి ఈటల రాజేందర్ సీఎం దృష్టికి తీసుకొచ్చారు.

దీని సీఎం కేసీఆర్ స్పందిస్తూ.. ‘‘హైదరాబాద్ చాలా పెద్ద నగరం. దేశవ్యాప్తంగా అన్ని నగరాల్లో వైరస్ వ్యాప్తి ఎక్కువవుతున్న క్రమంలో హైదరాబాద్‌లోనూ అదే పరిస్థితి ఉండటం సహజం. లాక్‌డౌన్ ఎత్తేసిన తర్వాత, ప్రజల కదలిక పెరిగింది. దీంతో వైరస్ వేగంగా వ్యాప్తి చెందుతోంది. తమిళనాడు రాజధాని చెన్నైలో మళ్లీ లాక్ డౌన్ విధించారు. దేశంలో ఇతర నగరాలు కూడా ఇదే దిశగా ఆలోచన చేస్తున్నాయి. హైదరాబాద్‌లోనూ 15 రోజుల పాటు లాక్ డౌన్ విధించడం మంచిదనే ప్రతిపాదనలు వైద్యశాఖ నుంచి వస్తున్నాయి.కానీ లాక్‌డౌన్ విధించడం చాలా పెద్ద నిర్ణయం. ఇందుకోసం ప్రభుత్వ యంత్రాంగాన్ని, ప్రజలను సన్నద్ధం చేయాల్సి ఉంటుంది. ముఖ్యంగా పోలీసు యంత్రాంగాన్ని సిద్ధం చేయాలి. కేబినెట్‌ను సమావేశపరచాలి. అందరి అభిప్రాయాలు తీసుకుని లాక్‌డౌన్‌పై నిర్ణయం తీసుకోవాల్సి ఉంటుంది. రెండు మూడు రోజుల పాటు పరిస్థితిని క్షుణ్ణంగా పరిశీలిస్తాం.

అవసరం అనుకుంటే.. మూడు నాలుగు రోజుల్లో కేబినెట్‌ను సమావేశ పరిచి, జీహెచ్ఎంసీ పరిధిలో మళ్లీ లాక్‌డౌన్ విధించాలనే ప్రతిపాదనలతోపాటు అన్ని విషయాలను, ప్రత్యామ్నాయాలను చర్చించి నిర్ణయం తీసుకుంటాం’’ అని తెలిపారు.