తలనీలాలు సమర్పిస్తుంటారు కదా ఎందుకు ?

తిరుమల శ్రీవారి దర్శనానికి వెళ్లే భక్తులలో చాలామంది గుండు చేయించుకుని తలనీలాలు సమర్పిస్తుంటారు. కాలక్రమేణా ఇది ఒక మొక్కుబడిగా మారినప్పటికీ, మన సనాతన ధర్మంలో దీని వెనుక ఒక గొప్ప అంతరార్థం మరియు విశిష్టత ఉన్నాయి..

మన శాస్త్రాల ప్రకారం తలనీలాలు అర్పించడం అనేది కేవలం జుట్టు తీసేయడం కాదు… అదొక పవిత్రమైన అంతర్గత శుద్ధి ప్రక్రియ. భగవంతుని సన్నిధికి వెళ్లేముందు మనల్ని మనం పవిత్రం చేసుకోవడానికి ఇది ఒక మార్గం..మనుషులలో అందానికి, అహంకారానికి ప్రతీక జుట్టు. అలాంటి జుట్టును దేవుడి పాదాల దగ్గర సమర్పించడం అంటే… “స్వామీ! నాకున్న అహంకారాన్ని, గర్వాన్ని నీ దగ్గరే వదిలేస్తున్నాను” అని అర్ధం.భక్తులు తమ పాపాలను, పూర్వ కర్మలను తొలగించుకునే ఆధ్యాత్మిక క్రమంలో ఈ తలనీలాలు తీయించుకోవడం (దీనినే శాస్త్రంలో ‘వపన క్రియ’ అంటారు) ఒక ముఖ్యమైన భాగం.

మనం చేసే ప్రతి పుణ్యకార్యంలోనూ, పవిత్ర యాత్రలలోనూ ఈ వపన క్రియకు ఎంతో ప్రాధాన్యత ఉంది. అందుకే తిరుమలలో తలనీలాల సమర్పణకు అంతటి విశిష్టత లభించింది.

శ్రీవారిపై మనకున్న అచంచలమైన భక్తికి, వినయానికి ఈ సాంప్రదాయమే అసలైన నిదర్శనం..