మైనర్ కూతురిపై యువకుడు అత్యాచారం.. దగ్గరుండి సహకరించిన కన్న తల్లి..

మైనర్ కూతురిపై యువకుడు అత్యాచారం.. దగ్గరుండి సహకరించిన కన్న తల్లి

ఉప్పల్ పోలీస్‌స్టేషన్ పరిధిలో మైనర్ బాలికపై యువకుడు పలుమార్లు లైంగిక దాడికి పాల్పడ్డాడన్న ఆరోపణలు కలకలం రేపాయి. బాలిక తల్లి నిందితుడికి సహకరించిందన్న ఆరోపణలతో పోలీసులు ఆమెను కూడా అదుపులోకి తీసుకున్నారు.

పోలీసులు తెలిపిన వివరాల ప్రకారం.. మేడిపల్లి ప్రాంతానికి చెందిన మాలోత్ రవికి బాలిక తల్లి శారదతో పరిచయం ఉంది. ఈ పరిచయంతో రవి తరచూ వారి ఇంటికి వచ్చేవాడని పోలీసులు తెలిపారు. ఈ క్రమంలో బాలిక తల్లి సహకారంతో మైనర్ బాలికపై పలుమార్లు లైంగిక దాడికి పాల్పడినట్లు ఫిర్యాదు అందింది.

ఈ విషయం ఎవరికైనా చెబితే చంపుతానంటూ బాలికను నిందితుడు బెదిరించినట్లు పోలీసులు పేర్కొన్నారు. కొంతకాలంగా బాలిక ఆరోగ్యంలో మార్పులు కనిపించడంతో కుటుంబ సభ్యులు అనుమానించి వైద్య పరీక్షలు చేయించగా, బాలిక గర్భం దాల్చిన విషయం వెలుగులోకి వచ్చినట్లు తెలిపారు.

బాధితురాలి తరఫున అందిన ఫిర్యాదు మేరకు ఉప్పల్ పోలీసులు పోక్సో చట్టం కింద కేసు నమోదు చేసి దర్యాప్తు చేపట్టారు. లైంగిక దాడికి పాల్పడ్డాడన్న ఆరోపణలపై మాలోత్ రవితో పాటు, నేరానికి సహకరించిందన్న ఆరోపణలపై బాలిక తల్లి శారదను పోలీసులు అదుపులోకి తీసుకున్నారు.

నిందితులిద్దరినీ కోర్టులో హాజరుపరచగా, న్యాయస్థానం ఆదేశాల మేరకు రిమాండ్‌కు తరలించినట్లు ఉప్పల్ ఇన్‌స్పెక్టర్ రామలింగారెడ్డి తెలిపారు. మైనర్లపై లైంగిక దాడులకు పాల్పడితే చట్ట ప్రకారం కఠిన చర్యలు తప్పవని పోలీసులు హెచ్చరించారు.