అగ్రిగోల్డ్ వైస్ చైర్మన్ హఠాన్మరణం.. హత్యా? గుండెపోటా?
అగ్రిగోల్డ్ వైస్ చైర్మన్ సదాశివ వరప్రసాద్ రావు సోమవారం రాత్రి అనుమానాస్పద రీతిలో మృతి చెందారు. సికింద్రాబాద్ రైల్వే స్టేషన్‌ ప్రాంగణంలో ఆయన విగత జీవిగా కనిపించారు. పార్శిల్ కౌంటర్ దగ్గరకు రాగానే ఆయన ఒక్కసారిగా కుప్పకూలారు. దీంతో అక్కడున్న వారు వెంటనే అప్రమత్తమై రైల్వే పోలీసులకు సమాచారం అందించారు. వెంటనే రంగంలోకి దిగిన రైల్వే పోలీసులు కేసు నమోదు చేసుకుని దర్యాప్తు చేపట్టారు. పోస్టుమార్టమ్ తర్వాత కుటుంబీకులకు మృతదేహాన్ని అప్పగిస్తామని చెప్పారు. సదాశివ గుండె పోటుతో చనిపోయి ఉంటారని బంధువులు భావిస్తున్నారు. పోస్ట్ మార్టమ్ రిపోర్ట్ వస్తే.. ఆయన మరణానికి గల కారణాలేంటో తెలిసే వీలుంది.
అగ్రి గోల్డ్ స్కామ్ ఏపీలో రాజకీయ దుమారం రేపిన సంగతి తెలిసిందే. ఈ స్కామ్ నాలుగు రాష్ట్రాలను కుదిపేసింది. ఎక్కువ సొమ్ము వస్తుందనే ఆశతో చాలా మంది అగ్రిగోల్డ్‌లో పెద్ద మొత్తంలో డిపాజిట్లు చేశారు. కానీ సకాలంలో డిపాజిట్లు చెల్లించడంలో ఆ సంస్థ విఫలమైంది. దాదాపు 13 లక్షల మందికి పైగా అగ్రిగోల్డ్‌ను నమ్మి మోసపోయామని వాపోయారు. అగ్రిగోల్డ్ స్కాం నిందితుల్లో సదాశివ ఒకరు.
గత నవంబర్లో విజయవాడలోని సదాశివరావు ఇంట్లో ప్రవేశించిన ఏడుగురు దుండగులు.. ఆయన కొడుకు మీద దాడి చేసి.. తీవ్రంగా గాయపరిచారు. పట్టపగలే జరిగిన ఈ ఘటన అప్పట్లో సంచలనం సృష్టించింది. ఈ ఘటన నేపథ్యంలో సదాశివరావు హఠాన్మరణం పట్ల కూడా అనుమానాలు వ్యక్తం అవుతున్నాయి.
About The Author
