ఖైరతాబాద్‌ గణపతి ఈసారి శ్రీద్వాదశాదిత్య మహాగణపతిగా...

హైదరాబాద్… ఏటేటా ఎంతో వైవిధ్యాన్ని సంతరించుకునే ఖైరతాబాద్‌ గణపతి ఈసారి శ్రీద్వాదశాదిత్య మహాగణపతిగా దర్శనమివ్వనున్నారు. ఈ మేరకు ఖైరతాబాద్‌ వినాయకుడి నమూనాను మంగళవారం ఉత్సవ కమిటీ సభ్యులు విడుదల చేశారు. ఈ ఏడాది ‘శ్రీ ద్వాదశాదిత్య మహాగణపతి’ పేరుతో విగ్రహాన్ని ప్రతిష్ఠించనున్నట్లు వెల్లడించారు. ఖైరతాబాద్‌ గణేశ్ మండపం వద్ద ఏర్పాటు చేసిన కార్యక్రమంలో ఉత్సవ కమిటీ ఛైర్మన్‌ సుదర్శన్‌, శిల్పి రాజేంద్రన్‌ తదితరులు విగ్రహ నమూనాను ఆవిష్కరించారు. ఈ సందర్భంగా విగ్రహానికి సంబంధించిన వివరాలను వెల్లడించారు.

ఈసారి మహాగణపతి విగ్రహాన్ని 61 అడుగుల ఎత్తు, 28 అడుగుల వెడల్పుతో ఏర్పాటు చేస్తున్నట్లు ఉత్సవ కమిటీ సభ్యులు వెల్లడించారు. విగ్రహం కోసం ఇప్పటికే 65 అడుగుల ఎత్తున షెడ్డు నిర్మాణం పూర్తయిందని చెప్పారు. విగ్రహం ముఖ భాగం సూర్యుడిని పోలి ఉంటుందని.. విగ్రహానికి 12 తలలు, 24 చేతులు, 12 సర్పాలు, 7 గుర్రాలు ఉంటాయని వివరించారు.

విఘ్నేశ్వరుడికి కుడి, ఎడమ భాగాల్లో సిద్ధ కుంజిగాదేవి, దత్తాత్రేయ విగ్రహాలు ఏర్పాటు చేస్తామన్నారు. విగ్రహానికి కుడివైపున గల చిన్న మండపంలో మహావిష్ణువుతో పాటు ఏకాదశా దేవి విగ్రహం, ఎడమవైపున మహాకాళితో పాటు త్రిమూర్తుల విగ్రహం ఏర్పాటు చేయనున్నారు. ఈ విగ్రహాలను 16 అడుగుల పొడవుతో నిర్మించనున్నారు.