రుయా ఆసుపత్రి కాంట్రాక్ట్, ఔట్సోర్సింగ్, ఆప్కాస్ ఉద్యోగులకు నెలకు రూ.26,000 కనీస వేతనం
తిరుపతి,జూలై 9,,రుయా ఆసుపత్రి కాంట్రాక్ట్, ఔట్సోర్సింగ్, ఆప్కాస్ ఉద్యోగులకు నెలకు రూ.26,000 కనీస వేతనం అమలుచేయాలి
*జూలై 30న కలెక్టర్ కార్యాలయం వద్ద జరిగే భారీ ధర్నాను జయప్రదం చేయండి – సీఐటీయూ*
రుయా ఆసుపత్రిలో పనిచేస్తున్న కాంట్రాక్ట్, ఔట్సోర్సింగ్, ఆప్కాస్ ఉద్యోగులకు నెలకు రూ.26,000 కనీస వేతనం అమలు చేయాలని డిమాండ్ చేస్తూ సీఐటీయూ ఆధ్వర్యంలో నేడు రుయా ఆసుపత్రి ఆవరణలో కనీస వేతనాల ప్రచార కరపత్రాన్ని ఆవిష్కరించారు.ఈ సందర్భంగా సీఐటీయూ జిల్లా ప్రధాన కార్యదర్శి టి. సుబ్రమణ్యం, రుయా ఆసుపత్రి వర్కింగ్ ప్రెసిడెంట్ కె. వేణుగోపాల్, సీఐటీయూ నగర అధ్యక్షురాలు ఈ. బుజ్జి మాట్లాడుతూ, రాష్ట్రంలో కనీస వేతనాల సవరణ జరిగి దాదాపు రెండు దశాబ్దాలు గడిచిపోయిందన్నారు. ఈ కాలంలో నిత్యావసర వస్తువుల ధరలు, ఇంటి అద్దెలు, విద్య, వైద్యం, విద్యుత్ ఛార్జీలు, రవాణా ఖర్చులు విపరీతంగా పెరిగినా, కార్మికుల వేతనాలు మాత్రం పెరగలేదని ఆవేదన వ్యక్తం చేశారు.
నేడు వేలాది మంది కాంట్రాక్ట్, ఔట్సోర్సింగ్, ఆప్కాస్ ఉద్యోగులు చాలీచాలని జీతాలతో కుటుంబాలను పోషించలేని దుస్థితిలో జీవిస్తున్నారని తెలిపారు. కనీస అవసరాలు కూడా తీర్చుకోలేక అప్పుల పాలవుతూ, తీవ్రమైన ఆర్థిక ఇబ్బందులు ఎదుర్కొంటున్నారని పేర్కొన్నారు. కార్మికులు సమాజానికి అత్యంత అవసరమైన సేవలు అందిస్తున్నప్పటికీ వారికి గౌరవప్రదమైన జీవనం కల్పించేంత వేతనం అందకపోవడం బాధాకరమన్నారు.ప్రస్తుత ధరలకు అనుగుణంగా నెలకు కనీసం రూ.26,000 కనీస వేతనం అమలు చేయాలని, రాష్ట్ర ప్రభుత్వం వెంటనే కనీస వేతనాల మండలి సమావేశం నిర్వహించి అన్ని రంగాల కార్మికులకు సవరించిన కనీస వేతనాలను ప్రకటించాలని డిమాండ్ చేశారు.ఈ డిమాండ్ సాధన కోసం సీఐటీయూ ఆధ్వర్యంలో రాష్ట్రవ్యాప్తంగా జూలై నెల పొడవునా కనీస వేతనాల ప్రచార కార్యక్రమాలు, కరపత్రాల పంపిణీ, సంతకాల సేకరణ చేపడుతున్నట్లు తెలిపారు. ఈ ఉద్యమంలో భాగంగా జూలై 30న జిల్లా కలెక్టర్ కార్యాలయం వద్ద భారీ ధర్నా నిర్వహించనున్నట్లు వెల్లడించారు. కార్మికులు, ఉద్యోగులు, ప్రజాసంఘాలు పెద్ద సంఖ్యలో పాల్గొని ఈ కార్యక్రమాన్ని విజయవంతం చేయాలని పిలుపునిచ్చారు.ఈ కార్యక్రమంలో సుమతి, ఎ. నరసింహులు, కాంచనమాల, గాంధీ, దయాసాగర్, శివ తదితరులు పాల్గొన్నారు.
నమస్కారములతో,
కె. వేణుగోపాల్
వర్కింగ్ ప్రెసిడెంట్
రుయా ఆసుపత్రి (సీఐటీయూ)
About The Author
