బావిలోకి దూకి మహిళ ప్రాణాలను కాపాడిన హెడ్ కానిస్టేబుల్

తిరుపతి జులై 21: తిరుపతి జిల్లా. ఎస్పీ శ్రీ ఎల్. సుబ్బరాయుడు, ఐపీఎస్., గారి ఆదేశాల మేరకు, ప్రజల భద్రతకు అత్యున్నత ప్రాధాన్యత ఇస్తూ జిల్లా పోలీసు యంత్రాంగం నిరంతరం అప్రమత్తంగా విధులు నిర్వహిస్తోందని అనడానికి ఇది ఒక నిదర్శనమని చెప్పవచ్చు.

21-07-2026 ఉదయం సుమారు 7.00 గంటల సమయంలో తిరుపతి జిల్లా పోలీస్ కమాండ్ అండ్ కంట్రోల్ సెంటర్‌కు శ్రీనివాస మంగాపురం సమీపంలో ఓ మహిళ బావిలో దూకి ఆత్మహత్యాయత్నానికి పాల్పడినట్లు అత్యవసర సమాచారం అందింది. సమాచారం అందిన క్షణాల్లోనే కమాండ్ అండ్ కంట్రోల్ సెంటర్ సిబ్బంది అప్రమత్తమై చంద్రగిరి పోలీస్ స్టేషన్‌కు సమాచారాన్ని చేరవేసి, సంఘటన స్థలానికి పోలీసు బృందాన్ని అత్యవసరంగా పంపించారు.

సమాచారం అందుకున్న వెంటనే చంద్రగిరి ఇన్‌చార్జి ఇన్‌స్పెక్టర్ శ్రీ టి.వి. సత్యనారాయణ గారి ఆదేశాల మేరకు, ఎస్‌ఐ శ్రీ ఈ. అరుణాచలం వారి పర్యవేక్షణలో హెడ్ కానిస్టేబుల్ కె. చలపతి (HC No.2819) సంఘటన స్థలానికి చేరుకున్నారు. పరిస్థితి అత్యంత ప్రమాదకరంగా ఉందని గమనించిన ఆయన ఏమాత్రం ఆలస్యం చేయకుండా, తన ప్రాణాలను సైతం లెక్కచేయకుండా బావిలోకి దూకి, ఆత్మహత్యాయత్నానికి పాల్పడిన మహిళను సాహసోపేతంగా రక్షించి సురక్షితంగా బయటకు తీసుకువచ్చారు.

అనంతరం మహిళకు ప్రాథమిక చికిత్స అందించి, మెరుగైన వైద్యం కోసం సంబంధిత ఆసుపత్రికి తరలించారు. తిరుపతి జిల్లా పోలీస్ కమాండ్ అండ్ కంట్రోల్ సెంటర్ సమయానుకూల సమన్వయం, చంద్రగిరి పోలీసుల వేగవంతమైన స్పందన, హెడ్ కానిస్టేబుల్ కె. చలపతి ధైర్యసాహసాల వల్ల ఒక నిండు ప్రాణం కాపాడబడింది.

ప్రాథమిక విచారణలో, సదరు మహిళకు గతంలో వివాహం జరిగి అనంతరం విడాకులు జరిగినట్లు, వ్యక్తిగత మరియు కుటుంబ సమస్యల కారణంగా తీవ్ర మనస్తాపానికి గురై ఈ ఆత్మహత్యాయత్నానికి పాల్పడినట్లు తెలిసింది. ఈ ఘటనపై పోలీసులు తదుపరి విచారణ కొనసాగిస్తున్నారు.

విధి నిర్వహణలో భాగంగా ప్రజల ప్రాణాలను రక్షించేందుకు తన ప్రాణాలను సైతం పణంగా పెట్టి చూపిన హెడ్ కానిస్టేబుల్ కె. చలపతి ధైర్యసాహసం పోలీసు శాఖ సేవా తత్వానికి నిదర్శనంగా నిలిచింది. ఆపదలో ఉన్న ప్రజలను కాపాడటమే పోలీసు శాఖ యొక్క ప్రథమ కర్తవ్యమని చంద్రగిరి పోలీసులు మరోసారి తమ కార్యాచరణ ద్వారా నిరూపించారు.

ఈ సందర్భంగా జిల్లా ఎస్పీ శ్రీ ఎల్. సుబ్బరాయుడు, ఐపీఎస్., సందేశం ఇస్తూ, “ప్రజల ప్రాణాలను కాపాడటం, ఆపదలో ఉన్న వారికి వెంటనే అండగా నిలవడం పోలీసు శాఖ యొక్క అత్యున్నత బాధ్యత. అవసరమైతే తమ ప్రాణాలను సైతం లెక్కచేయకుండా సేవ చేయడం ప్రతి పోలీసు అధికారికి, సిబ్బందికి విధి మాత్రమే కాదు, బాధ్యత కూడా. చంద్రగిరి హెడ్ కానిస్టేబుల్ కె. చలపతి చూపిన ధైర్యసాహసం పోలీసు శాఖ సేవాభావానికి ప్రతీక” అని పేర్కొన్నారు.

అలాగే, “జీవితంలో ఎలాంటి సమస్య వచ్చినా ఆత్మహత్య ఎన్నటికీ పరిష్కారం కాదు. ప్రతి సమస్యకు ఒక పరిష్కారం ఉంటుంది. ఒక్క క్షణం ఆలోచిస్తే కొత్త ఆశలు, కొత్త అవకాశాలు కనిపిస్తాయి. క్షణికావేశంలో తీసుకునే నిర్ణయం కుటుంబ సభ్యులకు జీవితాంతం తీరని విషాదాన్ని మిగులుస్తుంది. మానసిక ఒత్తిడి, కుటుంబ సమస్యలు లేదా వ్యక్తిగత ఇబ్బందులు ఎదురైనప్పుడు ఒంటరిగా బాధపడకుండా కుటుంబ సభ్యులు, స్నేహితులు లేదా సంబంధిత అధికారులను సంప్రదించి సహాయం పొందాలి. ఒక నిర్ణయం జీవితాన్ని ముగించవచ్చు… కానీ ఒక సంభాషణ జీవితాన్ని కాపాడగలదు. అందుకే ఎవరూ ఆత్మహత్య వంటి తీవ్రమైన నిర్ణయాలు తీసుకోకూడదు” అని ప్రజలకు విజ్ఞప్తి చేశారు.

అత్యవసర పరిస్థితుల్లో ప్రజలు ఎలాంటి సంకోచం లేకుండా వెంటనే డయల్–112కు సమాచారం అందించాలని, తిరుపతి జిల్లా పోలీసు శాఖ 24 గంటలూ ప్రజల భద్రత, ప్రాణ రక్షణ కోసం అప్రమత్తంగా సేవలందిస్తోందని జిల్లా ఎస్పీ గారు తెలిపారు.