శస్త్ర చికిత్స అయిపోయింది… వెంటనే విధుల్లోకి వచ్చేస్తానంటున్నారు
* శస్త్ర చికిత్స అనంతరం తగిన విశ్రాంతి అవసరం అని శ్రీ పవన్ కళ్యాణ్ గారికి సూచించాను
* మూడు వారాల ఫిజియోథెరపీ ఉంటుందని వైద్యులు తెలిపారు
* ఆరు నెలల తర్వాత రెండో భుజానికి పరీక్షలు చేస్తారు
* శ్రీ పవన్ కళ్యాణ్ గారి ఆరోగ్యం నిలకడగా ఉంది
* ఉప ముఖ్యమంత్రివర్యులు ఆరోగ్య వివరాలను శ్రీమతి అన్నా కొణిదల గారిని అడిగి తెలుసుకున్న గౌరవ ముఖ్యమంత్రివర్యులు శ్రీ చంద్రబాబు నాయుడు గారు
* శ్రీ పవన్ కళ్యాణ్ గారిని ముంబయి ఆస్పత్రిలో పరామర్శించిన ముఖ్యమంత్రివర్యులు… అనంతరం మీడియాకు వివరాలు వెల్లడి
‘ప్రజా క్షేత్రంలోకి ఉప ముఖ్యమంత్రి శ్రీ పవన్ కళ్యాణ్ గారు నూతనోత్సాహంతో, సంపూర్ణ ఆరోగ్యంతో తిరిగి వస్తారు. ఆయనకు చాలా కీలకమైన శస్త్ర చికిత్స జరిగింది. మూడున్నర గంటలపాటు అత్యున్నత వైద్యుల బృందం విజయవంతంగా ఆపరేషన్ పూర్తి చేశారు. ఏళ్ల తరబడి ఉన్న తీవ్రమైన గాయాన్ని ఆయన ప్రజాసేవలో నిమగ్నమై నిర్లక్ష్యం చేశారు. ఇప్పుడు శస్త్రచికిత్స విజయవంతం కావడంతో, ఆయన పూర్తిగా కోలుకుంటున్నార’ని గౌరవ ముఖ్యమంత్రి శ్రీ నారా చంద్రబాబు నాయుడు గారు చెప్పారు. ఉప ముఖ్యమంత్రివర్యులు, జనసేన పార్టీ అధినేత శ్రీ పవన్ కళ్యాణ్ గారి కుడి భుజానికి శస్త్రచికిత్స విజయవంతంగా పూర్తి కావడంతో ముంబయిలోని కోకిలాబెన్ ధీరుబాయ్ అంబానీ ఆస్పత్రిలో వైద్యల పర్యవేక్షణలో ఉన్నారు. శ్రీ పవన్ కళ్యాణ్ గారిని ఆదివారం గౌరవ ముఖ్యమంత్రి శ్రీ చంద్రబాబు నాయుడు గారు, మంత్రులు శ్రీ నారాయణ గారు, శ్రీ అనగాని సత్యప్రసాద్ గారు పరామర్శించారు. ముఖ్యమంత్రి గారు వచ్చే సమయానికి ఆస్పత్రిలోనే ఉన్న మంత్రివర్యులు, జనసేన పార్టీ పీఏసీ ఛైర్మన్ శ్రీ నాదెండ్ల మనోహర్ గారు, రాజ్యసభ సభ్యులు శ్రీ లింగమనేని రమేష్ గారు శ్రీ చంద్రబాబు గారిని వైద్యుల పర్యవేక్షణలో ఉన్న శ్రీ పవన్ కళ్యాణ్ గారి వద్దకు తీసుకొని వెళ్లారు. శ్రీ చంద్రబాబు గారు శ్రీ పవన్ కళ్యాణ్ గారితో, ఆయన సతీమణి శ్రీమతి అన్నా కొణిదల గారితో ప్రత్యేకంగా మాట్లాడి ఆరోగ్య వివరాలను అడిగి తెలుసుకున్నారు. ఆరోగ్యం పట్ల జాగ్రత్త వహించాలని సూచించారు. శస్త్రచికిత్స చేసిన వైద్యులతోనూ శ్రీ చంద్రబాబు గారు మాట్లాడి, వివరాలు అడిగి తెలుసుకున్నారు. అనంతరం ఆస్పత్రి వద్దనే మీడియా ప్రతినిధులతో శ్రీ చంద్రబాబు గారు మాట్లాడుతూ… ‘‘ఏళ్ల తరబడి రెండు భుజాలకు ఉన్న తీవ్రమైన గాయాలను ప్రజా సేవలో నిమగ్నమై శ్రీ పవన్ కళ్యాణ్ గారు పట్టించుకోలేదు. చిన్న చిన్న విషయాలను శ్రీ పవన్ కళ్యాణ్ గారు పట్టించుకోరు. ప్రజల్లో ఉన్నపుడు, పర్యటనల సమయంలో ఆయన మీదకు అభిమానులు ఆప్యాయంగా దూసుకురావడం, చేతులు పట్టుకొని పక్కకు లాగడం, తోపులాట వల్ల భుజాలకు ఉన్న సమస్య తీవ్రమైంది. ఇటీవల ఆయన వైద్య పరీక్షలకు వచ్చిన సమయంలోనే సమస్య తీవ్రమైనదిగా గుర్తించి, వెంటనే కుడి భుజానికి శస్త్ర చికిత్స అవసరం అని డాక్టర్లు చెప్పారు. కుడి భుజానికి ఆపరేషన్ విజయవంతం అయింది. దాని తర్వాత వైద్యుల పర్యవేక్షణ, ఫిజియోథెరపీ వంటివి ఉంటాయి. 3 వారాలపాటు వైద్యుల పర్యవేక్షణలో, ఫిజియోథెరపీ చేయడం వల్ల భుజానికి ఉన్న సమస్య పరిష్కారం అవుతుంది. రెండో భుజానికి కూడా సమస్య ఉందని వైద్యులు తెలిపారు. కుడి భుజానికి ఉన్న సమస్య తీరిన తర్వాత 6 నెలలు వేచి చూసి, మళ్లీ వైద్యులు పరీక్షలు చేస్తారు. అప్పుడు ఎడమ భుజానికి ఆపరేషన్ అవసరం అవుతుందా..? లేక ఫిజియోథెరపీతో పరిష్కారం అవుతుందా అన్నది తేలుతుంది. శ్రీ పవన్ కళ్యాణ్ గారు మునుపటి ఉత్సాహంతో, పూర్తి ఆరోగ్యంతో మళ్లీ ప్రజాసేవలోకి తిరిగి వస్తారు. ఆయన ఆరోగ్యం ప్రస్తుతం చాలా నిలకడగా ఉంది. వైద్యుల పర్యవేక్షణ కొనసాగుతోంది” అని చెప్పారు.
About The Author
